Michelle Perez Life Story in Magpakailanman

Watch Pakawalang Anghel, the Michelle Perez Life Story in Magpakailanman on January 19, 2013.

Here's the Press Released from GMA for the said Magpakailanman episode: 

"Isa sa mga bagay na kinatatakutan ng mga magulang ang maligaw ng landas ang kanilang anak—lalo na kung ito ay babae at menor de edad. Pero para sa mag-asawang sina Ronald at Daisy, ito ang katotohanang haharapin nila, at ng kanilang anak na si Michelle Perez.

Ampon si Michelle Perez, iniwan ng inang katulong sa dating mga amo na kukupkupin naman ang bata at palalakihin na parang tunay na nanggaling sa kanila. Pero nang malaman ni Michelle ang totoo mula sa mga ito, mapupuno sina Ronald at Daisy ng guilt na hindi nila nabibigyan ng tamang love at attention si Michelle, kaya masosobrahan sila sa pagiging mapagbigay kay Michelle.

Isa sa mga hiningi ni Michelle sa mga magulang niya ay ang pagiging independent nito; pipilitin niya ang mga magulang na hayaan siyang umalis out of town kasama ng mga kaibigan. At dito sa trip na ito magbabago ang buhay ni Michelle.

Pumayag sina Ronald at Daisy sa pag-alis ng anak dahil may chaperone silang kasama. Hindi nalalaman na kasama ng chaperone ng mga dalaga ay isang lalake na mananamantala kay Michelle. Momolestiyahin ng lalake si Michelle, at sa takot ng dalaga na masisi sa nangyari, itatago ni Michelle mula sa mga magulang ang nangyari.

Pero ang paglilihim na ito ang siya ring magsisimula ng buhay na kaniya ring itatago mula sa kaniyang pamilya. Sa murang edad ay magkakaroon na siya ng boyfriend, magiging mapusok—at matututong gumamit ng ipinagbabawal na gamot.

Magiging takbuhan ni Michelle ang drugs sa lahat ng kaniyang problema—mula sa pakikipaghiwalay sa kaniya ng una niyang nobyo, hanggang sa pagtuklas sa kaniyang tunay na ina. Sa bawat problemang dumarating, lalong inilulubog ni Michelle ang sarili niya sa droga. Hanggang sa maging boyfriend niya si Allan at mabuntis siya nito.

Malalaman na nina Ronald at Daisy ang mga pinaggagawa ng anak, pero hindi pa rin titigil si Michelle. Magkakaroon ng dalawang anak si Michelle kay Allan, pero kung ang babae ay nakikita na ang hirap ng buhay, si Allan naman ay patuloy pa rin sa nakasanayang lifestyle.

Nang mahuli ni Michelle si Allan na may kasamang iba, iisipin nina Ronald at Daisy na baka matatauhan na sa wakas ang kanilang anak. Pero hiniwalayan man ni Michelle si Allan ay makakahanap lang din ito ng kapalit—na pareho rin ang maibibigay sa kaniyang buhay.

Hanggang kailan uulitin ni Michelle ang kaniyang mga pagkakamali? Tuluyan na ba siyang malulugmok sa kaniyang makamundong pamumuhay—o magagawa ba niyang iahon ang sarili?

Ngayong Sabado, alamin ang kinahantungan ng buhay ni Michelle Perez—sa natatanging pagganap nina Joyce Ching at Ehra Madrigal—sa Magpakailanman, pagkatapos ngKap’s Amazing Stories.

Itinatampok rin sa episode na ito sina Jomari Yllana, Yayo Aguila, Teejay Marquez,Ruru Madrid at Arthur Solinap. Mula sa panulat ni Aloy Adlawan, at sa direksyon ni Gina Alajar."